以前講起香港，大家都會聯想到東方之珠、購物天堂、金融中心。但去到2025年，一講起香港，相信越嚟越多人會諗起——「雞棚」。
「雞棚」本來係指古時候偷雞賊用嚟捉雞嘅一個臨時陷阱裝置，而唔係真正嘅養雞雞舍。呢個結構設計得極其簡易，唔需要複雜材料，只需幾條竹同樹枝，用樹枝撐起半圓形嘅竹棚，棚底放啲碎米誘餌，製作時間可能只需幾分鐘。當雞被吸引而走入去嘅時候，偷雞賊就會拉走樹枝，竹棚就會跌落嚟將雞困住。「雞棚」嘅設計本質上係「唔穩固」嘅，因為佢嘅目的就係要容易跌落嚟，從而困住目標（雞）。呢種暗中設局嘅方式後來就被引申成「搭雞棚」，意思係有人設計圈套，準備呃人。
想像吓，有人突然宣佈開「革命性」初創公司，聲稱有國際投資者撐腰，市場潛力無限。租靚寫字樓、請年輕團隊，大肆宣傳：社交媒體狂出post、KOL直播、辦roadshow派禮品，誇大回報率高達300%，透過眾籌或私募誘中產、退休人士、年輕白領投資幾萬甚至幾百萬。
但「雞棚」本質唔穩固，開業幾個月即因「資金斷裂」結業，拖欠租金、貨款、服務費、裝修費、廣告費。公司執笠，員工冇糧出，需申請破險基金。有限公司有限責任，股東唔使個人負責。呢班「老闆」早早轉移咗資產，繼續開名車、住豪宅、食米芝蓮，轉頭又喺另一個地方重施故技，搭過個新「雞棚」。警方話證據唔夠，頂多當商業糾紛處理。你敢公開話佢哋係老千？小心人哋反手告你誹謗，賠錢賠時間。
拒絕做「雞」入棚：4招教你識破老千圈套
要避免落入「雞棚」式騙局，無論你係投資者定係供應商，都需要保持警惕，多查背景，唔好只聽棚佬吹水。以下係幾個實用方法，識破「雞棚」：
1. 公司查冊：確認公司實力
去公司註冊處網站查公司註冊日期、股東、董事、地址同財務報告。如果公司新成立（少過一年）、註冊資本低、地址只係虛擬辦公室，就要小心。查埋年度申報表（NAR1），睇有冇準時提交或罰款記錄。
2. 訴訟查冊：睇有冇欠債史
可以請律師或收數公司（如Debt Hunter）查公司或董事嘅法庭記錄，特別留意拖欠貨款、破產或合約糾紛。假如發現多宗欠薪或欠租案件，證明佢哋唔可靠。
3. 可疑特徵：識別紅旗
- 訂單可疑：大額訂單但無訂金、要求延長賬期、或用私人戶口轉賬，就係警告。
- 宣傳過火： 聲稱「國際合作」但查唔到證據，團隊背景模糊，或急催交貨但拖付款。
- 壓力手法： 「機會有限，錯過就冇」，唔俾時間你評估考慮，但一問細節就閃爍其詞。
4. 識人術：觀察行為
留意老闆「魅力」過盛但避談細節，如問「付款計劃」就轉話題。利用貪婪或恐懼（如「市場緊俏」）催你供貨。查埋社交媒體，睇有冇負評或假好評。
避免「雞棚」最重要係「唔貪、唔急、多查」。香港越嚟越多呢啲騙局，但只要大家提高意識，就唔會咁易變成「雞」入棚。記住，真正好客唔怕你查，騙子先怕你驗證。
搵收數公司？
Debt Hunter 自2009年起為中小企提供合法收數服務，追收團隊超過20人，絕無外判人員，已協助超過10,000家公司收回欠款，信用資料庫全港最齊，梗幫到你。
Debt Hunter 將通過不成功不收費、先調查後調解嘅模式，為傳統收數行業帶來新嘅變革，不斷為客戶創造價值，引領行業發展。