喺Threads見到有人分享成功「收數」故事，覺得好吸引，心諗有個朋友爭緊自己十幾萬唔還，於是就主動聯絡「收數佬」。點知原來係騙局，俾人呃咗幾萬蚊前期費用，最後條數冇追到，仲隨時犯法。
香港收數公司雖然冇正式嘅發牌制度，但佢哋受多個機構間接監管，例如金管局同地監局，確保催收過程合法同道德。但正正因為收數俾公眾嘅固有印象屬於偏門，騙徒就乘機冒充收數公司呃人。
騙徒犯案手法大揭秘
講到收數騙案，騙徒通常喺社交平台如Threads、Instagram或Facebook開始佈局。佢哋會頻繁分享所謂嘅成功「收數」經歷，扮成專家同粉絲互動，建立信任。受害者多數係年輕人，大部份想追討私人欠款、投資欠款，就主動WhatsApp查詢騙徒。呢個時候，騙徒嘅WhatsApp只係「接案人」，會即刻轉介俾所謂「行動組」成員。行動組會報價，通常幾千蚊前期費用，即係「調查費」、「踩線費」等等，之後就好似正規收數公司咁從欠款拆賬，你要考慮？佢哋會狂Chur你。
一旦你同意，騙徒就要求你影低身份證同住址證明，要你將啲前期費用轉賬去一啲不明個人銀行戶口。為咗增加可信度，佢哋會安排「會計」出假Invoice，上面可能會冒充真實收數公司資料。如果你問佢哋同呢間公司嘅關係，佢哋會話自己係職員，甚至Send埋「委託合約」俾你簽。俾咗錢之後，騙徒會扮開始追收，叮囑你唔好聯絡欠債人。一至兩個星期後，佢哋又聲稱搵到欠債人，但要求你再俾幾萬蚊「看守費」，話要防止欠債人逃走。
你再俾錢之後，騙徒好快就會話收到全數，約你見面交收現金。但喺交收前一個鐘，佢哋會作故事話同事架車上有紅油同武器俾警方拉咗，欠款扣咗喺警署。然後會出一張冒充真實律師樓嘅授權書要你簽，話你授權嗰間律師樓「代表」去警署領錢，而嗰個「代表」都係假嘅。仲有，佢哋會出一張假嘅商業合約要你簽，話你向某公司訂產品，支付咗相當欠款金額嘅訂金，用嚟向警方證明係商業欠款。你簽完，佢哋會話同事要上庭，要你再俾多幾萬蚊出嚟，喺呢個時候醒覺已經太遲。
成個過程，你都冇見過真人，淨係可以WhatsApp Call（用正常電話打唔通，大部份「號碼已停用」），騙徒團隊分工合作，步步引你入局。唔係拍戲，現實就好多人中招。
唔小心隨時誤墮法網？
好多時受害人因為心急想收數，簽咗啲假文件，可能無意中涉嫌刑事罪行。如果你簽咗假授權書或商業合約，偽造文件去「證明」欠款係商業性質，呢個可能觸犯欺詐罪（《盜竊罪條例》第16A條）或製造虛假文書（《刑事罪行條例》第71條）。另外，騙徒要求你轉賬去一啲不明個人銀行戶口，呢啲行為可能涉嫌洗黑錢（《有組織及嚴重罪行條例》第25(1)條）或相關罪行。
更可怕係，你已經影低咗身份證同住址證明俾騙徒，如果騙徒亂咁用你嘅個人資料，可能用你名義借大耳窿，可能用你資料呃下一個受害人（曾有受害人喺另一單騙案變咗「律師樓代表」）。咁你覺得呢樣嘢有幾危險？會唔會即刻報警求助？
我哋見過好多受害者事後後悔，因為佢哋原本只想追返條數，點知收唔到仲變咗嫌疑犯。呢個部分想提醒大家，合法收數途徑有好多，例如搵正規收數公司，或者去小額錢債審裁處，亦都可以出律師信。保持警惕，先保護自己唔好誤墮法網。
3招教你識別騙徒
- 查核公司背景：你可以Google公司名，睇下相關資料，核對一下你搵嗰位「收數專員」嘅電話係咪同公司官網相乎，或打去核實身份，提防假冒。亦都可以入去稅務易 > 查詢商業登記號碼，睇下呢間公司係咪有商業登記先。
- 留意收費模式：正牌收數公司通常唔會收大筆前期費用，佢哋多數從成功追討嘅欠款抽佣金。如果你被要求轉賬俾個人戶口，又要俾「調查費」或「看守費」，九成係騙局。
- 睇清楚文件先好簽：簽署任何文件前要睇清楚，唔好亂簽不明文件，因為騙徒提供嘅有機會係虛假文書，簽咗可能誤墮法網。
記住，合法途徑永遠係王道，唔好貪快中伏。保護自己，從今日開始，唔好俾騙徒有機可乘。
搵收數公司？
Debt Hunter 自2009年起為中小企提供合法收數服務，追收團隊超過20人，絕無外判人員，已協助超過10,000家公司收回欠款，信用資料庫全港最齊，梗幫到你。
Debt Hunter 將通過不成功不收費、先調查後調解嘅模式，為傳統收數行業帶來新嘅變革，不斷為客戶創造價值，引領行業發展。